農曆新年將至，家家戶戶都準備緊過年，又要辦年貨又要籌備團年飯，真係忙過開工呀，咁忙驚會做漏工夫? 咁不如一齊睇吓過年有啲咩嘢一定會做嘅「指定動作」啦！

(1)「唱」新銀紙

過年就少不免要封利事啦，好多人都會「唱」定一啲全新嘅紙幣去封銀紙，取其意頭新年「新」開始咁話。其實金管局同埋三間發鈔銀行已經响2020年1月14日開始提供新鈔票俾市民兌換，當然亦都鼓勵各位可以用「迎新鈔」封利事，支持一下環保。

(2) 買新衫褲鞋襪

新年梗係要「萬象更新」啦，好多人都會買定靚衫過年，紅色當然係主色調啦，但係着到全身紅色成封「利事」咁就未必個個人都鍾意，所以有啲朋友就會買一啲紅色嘅配件代替，例如頭飾、領呔，手袋等等。此外，亦有人相信過年一定要買條褲，因為「褲」與「富」同音，而且一定要買長褲，取其意頭「長富」。買鞋就要响過年前買定啦，因為「鞋」諧音「唉」，過年買鞋「鞋鞋聲」，「唔老黎」吖嘛。

(3) 擺全盒

過年會响企擺全盒，一來取其意頭「全」，寓意來年十全十美，二來有親友嚟拜年都有嘢招呼人吖嘛。此外，全盒裡面通常都會放瓜子，取其諧音「金子」，而且一般人攞瓜子食嘅時候，動作會有啲似「挖銀子」，所以又會稱為「搲銀」，如果過年有人遞個全盒俾你叫你「搲銀」，你就唔好執輸啦。

(4) 買年花

好多人都會响過年嗰陣買返棵大桃花放响屋企，一來取其意頭「花開富貴」，二來寄寓嚟緊一年可以行返個「桃花運」吖嘛，而且屋企放得落愈大棵嘅桃花，就代表屋主擁有愈大間屋，自然就夠哂面子啦。

(5) 過年裝飾物

好多人都會趁過年嗰陣，响屋企佈置一啲裝飾，營造新年氣氛，順便攞返個好意頭。一般過年佈置除咗全盒同桃花之外，就梗係唔少得揮春啦，近年興起一啲「立體揮春」，揮春上面嘅一啲文字，例如大「吉」大利、年年有「餘」、「笑」口常開，會用立體嘅「桔」、「魚」同埋「笑面」毛公仔代替，務求令人睇完之後會心微笑，而且一般平面啲紙製揮春，過完年之後就會棄掉，但係立體揮春會用絨布等物料製成，一般都較為耐用，比較環保。

最後向各位拜個早年，謹祝各位2020庚子鼠年身體健康！萬事勝意！金銀滿屋！

小貼士：過年買新衫新鞋當然高興啦，但係買嗰陣唔覺唔覺買多咗，之後總要處理收納嘅問題，而且好多過年嘅用品，例如全盒、擺桃花嘅大花樽、甚至一啲可以留返來年再用嘅立體揮春，過完年之後就要等下次過年先可以大派用場，平時放响屋企又會佔地方，咁不妨將呢啲過年用品存放响於迷你倉，等下次過年嗰陣先再攞返出嚟用，咁就既環保又唔阻屋企地方啦！蘋果迷你倉除咗提供迷你倉服務之外，仲有專業嘅搬運服務，幫您上門搬運入倉之外，如果有好似大花樽呢類易碎嘅物品，搬運之前仲會幫你妥善包好添！查詢及預約睇倉：8208 9822。